طالب جديد اولى جغرافيا .... يبقى اكيد محتاج تقرا المقال دا

يا سنة اولى جغرافيا .... اعرف انت داخل على ايه

 

اولا مبروك قبولكم بقسمنا الجميل قسم الجغرافيا ونظم المعلومات الجغرافيه

والمقال دا عشان يساعدك فـ معرفة القسم وطريقة الدراسة فيه

اولا بتدرس سنتين دراسة عامة فـ مواد وتخصصات الجغرافيا

ثانيا دراسة اخر سنتين حسب التخصص اللى هتختاره وفـ قسمنا عندنا شعبتين

1- المساحة والخرائط ونظم المعلومات الجغرافيه

ودا ليها شروط خاصة وبتتغير يعنى مش ثابته كل سنة

ف الغالب بتكون بالتقدير التراكمى لـ سنة اولى وتانية

احيانا بيتطلب تقدير معين فـ بعض المواد المساحية اللى بتتدرس فـ سنة اولى وتانية

وفـ بعض السنوات كان فى اختبار قبول للشعبه

2- الجغرافيا ونظم المعلومات الجغرافيه 

ملهوش اى شروط

بالنسبة للطلبة فهم 3 اقسام

اولاُ انتظام : ودا بيكون عنده شفوى وابحاث على حسب رغبة الدكتور ساعات بيكون فى امتحان شفوى عليه 25 درجة او بحث بيطلبه الدكتور فـ المادة وبيكون فـ الغالب عليه 25 درجة وتحريري اخر الترم 75 درجة
لان المادة عندنا من 100 درجة
وفى مواد ال 100 درجة كاملة على امتحان التحريرى اخر التيرم

ثانيا الانتساب العادى والموجه : ف الغالب المواد كلها بتكون من 100 درجة على الامتحان التحريري اخر التيرم الا ان فى بعض الدكاترة بيقرروا امتحان شفوى او بحث ويتم معامله جميع الطلاب الفئات الثلاثه بالمثل

دى طرق الدراسة فـ القسم

نيجي بقى لـ أهم القواعد

1- دكاترة كتير هيأكدوا عليها وهى إن الدراسة فـ قسمنا عن طريق المحاضرات

انك تحضرها بنفسك لان دا مهم جدا 

2- المذاكرة من :
* المحاضرات
*الكتب المقرره

*المراجع الجغرافيه الخارجية

ومن الاخر ممنوع منعا باتا انك تدرس من ورق عاملاه المكتبات

ولا محاضرات تشتريها من برا

دكاترة القسم عندنا بيجيبوا الورق دا وبيقروه  وبيعرفوا فـ الامتحانات اللى مذاكر من الورق الخارجى دا من اللى حاضر المحاضرات ومذاكر من الكتاب والابحاث المطلوبة

وبالطبع اللى بيذاكر من الورق الخارجى

اكيد هيشيل المادة

فاحذروا واحذروا من شراء المذاكرات والورق بتاع المكاتبات

الحاجاة الوحيدة المتاح شرائها هى امتحانات السنوات السابقة

3- المذاكرة اول بـ اول ، القسم دراستة صعبه شوية بتحتاج مجهود يعنى مينفعش تقول هذاكر المادة فـ اخر شهر واجمعها

للاسف الكلام دا مش عندنا اطلاقا

المواد عندنا بتتطلب مذاكرة اول ب اول لان عدد المواد ف الترم الواحد ف الغالب لا يقل عن 6 مواد

4- السكاشن مهمة جدا لان المعيدين والاساتذة بيسهلوا حاجات كتير اوى فـ المواد اللى ليها سكاشن خصوصا العملى والمواد اللى بتحتاج برامج على الكمبيوتر

5- إعرف طريقة كل دكتور ف شرح المادة يعنى مثلا  فى دكاترة بيشرحوا من الكتاب المقرر

وفى دكاترة بيعتمدوا على محاضراتهم الخاصة
وفى دكاترة بيمذجوا بين الاتنين المحاضرة والكتاب

ودا مش هتعرفه طبعا الا لما تحضر المحاضرات

نصائح من الخريجين :

1- خليك متطلع دايما حاول تقرا قبل المحاضرة شئ عن موضوعها عشان تبقى متابع مع الدكتور وهو بيشرح دا هيسهل عليك كتير

2- اوعى يكون فى محاضرة فيها غياب وحضور وتكتب اسم زميل ليك مش موجود لو اتعرف هتبقى مشكلة كبيرة جدا مع الدكتور ليك ولـ زميلك اللى كتبت اسمه

3- متستناش الكتب لما تنزل حاول تعرف من الدكتور الكتاب المقرر وحاول تشتريه من بياع كتب قديمة او تكلم زمايلك من تانية وتالته ورابعه عن الكتاب لغاية ميعاد الاستلام

او حتى نزله من على النت المهم انك تتابع الكتاب بالمحاضرة علشان تبقى محاضراتك كاملة لما تذاكرها

4- الماحضرات تتبيض اول بـ اول لما تروح علشان فى حاجات بتبقى فـ دماغك ومش كاتبها ومع مرور الوقت بتقع من راسك ومش هتعرف تجبها تانى

5-  الدكاترة والمعيدين والاساتذه مش بيحبوا الهزار او التهريج فـ المحاضرات
ولو دا حصل فـ محاضرة ما ممكن حد منهم يلغى المحاضرة ويعتبرها مشروحة " وتبتقى كارثة " او يعتبر محاضرات الترم كله مشروحة

6- حاول تعمل من اول السنة جدلو للمذراكرة لانك لو سبتها كدا هتلاقى الايام بتجرى وانت مقضى الايام ف الكلية والمذاكرة بتتكوم فوق بعضها ودا هيبقى ضغط كبير جدا ف عند امتحانات الشفوى واخر التيرم

7- افضل اوقات المذاكرة هى الفجر والنهار
يعنى عشان تذاكر صح لما تروح من الكلية تقعد قبل ما تنام تبيض المحاضرات وتراجعها
وتصحى الصبح بدرى ويفضل طبعا صلاة الفجر وانك تقعد تذاكر بعدها
(ان قران الفجر كان مشهودا)
فبعد صلاه الفجر يسهل الحفظ كتيرا ودا لنقاء الجو
فـ الفتره دى ودا بياثر كتير على الحفظ
حاول تبعد على اد ما تقدر عن السهر بالليل لانه بيجيب صداع وبيلخبط الوقت جدا

واخيرا الدراسة فـ قسم الجغرافيا ممتعه وسهله جدا للى ياخدها جد من الاول ويذراكر اول بـ اول

وبالتوفيق للجميع